O responsable do Goberno galego, Alberto Núñez Feijóo, constatou hoxe a gran demanda de terra que existe en Galicia con preto de 1.000 solicitudes para recuperar unhas 21.400 hectáreas xeolocalizadas ao abeiro da Manifestación de interese de proxectos do sector primario e agroalimentario galego.
Feijóo precisou que estas 21.322 hectáreas que puideron ser xeorreferenciadas a nivel de concello permiten relacionalas coas superficies de terras en estado de abandono ou infrautilización e coas zonas preferencias de actuación que se planificarán ao abeiro da Lei de recuperación da terra agraria de Galicia.
“É dicir, dispoñemos dunha valiosa información sobre a localización de terra abandonada e da demanda de terra, as características da terra abandonada e da terra solicitada, así como a orientación produtiva de toda esa terra en función das solicitudes recibidas. Polo tanto, podemos mobilizala a través dos instrumentos da devandita lei, como son as aldeas modelo, os polígonos agroforestais ou as agrupacións de xestión conxunta”, explicou, recordando que a convocatoria de Manifestación de interese é unha iniciativa non vinculante que permite identificar os interesados en participar nos proxectos tractores e transversais impulsados pola Xunta no marco da candidatura galega aos fondos europeos NextGeneration.
Cómpre salientar que un destes proxectos tractores leva asociada a posta en produción de 18.000 hectáreas de terra abandonada para os tres usos -agrícola, gandeiro e forestal-, así como a posta en marcha de 200 aldeas modelo. O titular do Goberno galego asegurou que a Xunta seguirá traballando para aumentar a oferta de terra ante a inxente necesidade de parcelas.
A maiores destes proxectos, Feijóo destacou que as cinco denominacións de orixe de viño solicitaron, á marxe da Manifestación de interese, máis de 10.000 hectáreas para desenvolver polígonos agroforestais destinados a viñedo, tamén no marco da Lei de recuperación. “Isto acredita a gran capacidade de nosa produción de viño, a súa calidade e o incremento das exportacións do noso sector viticultor”, remarcou.
O Presidente da Xunta finalizou asegurando que a folla de ruta do goberno autonómico pasa por casar oferta e demanda de terra co fin de revitalizar o medio rural de Galicia.
Pola súa banda, o conselleiro de Medio Rural especificou que máis de 13.200 hectáreas das solicitadas para mobilizar teñen orientación produtiva gandeira, das cales o 94% se corresponde con ganderías bovinas, mostra do peso deste sector na nosa comunidade. Tamén houbo peticións de ovino e porcino para levar a cabo gandaría en extensivo que contribuirá de xeito decidido -recalcou- á anticipación aos incendios forestais.
Así mesmo, José González apuntou que máis de 1.900 ha son para orientación produtiva agrícola, o 40,8% delas para viñedo, pero tamén para a plantación de cereais, pataca, froiteiras, hortalizas ou cultivos forraxeiros. Outras 1.400 hectáreas -dixo- son para produción forestal, fundamentalmente coníferas e frondosas caducifolias, na liña que marca o Plan Forestal de Galicia 2021-2040 de diversificación do noso monte. Por último, destacou que máis de 4.700 hectáreas foron solicitadas para terras mixtas, é dicir, produción agrícola, gandeira ou forestal, o que cualificou como unha mostra clara de que poden convivir os tres usos no territorio galego.