A Xunta e o Concello de Bande avalían a implantación dunha aldea modelo na parroquia de Nogueiroá, ao abeiro da Lei de recuperación da terra agraria de Galicia. Así, a directora xeral da Axencia Galega de Desenvolvemento Rural, Inés Santé, confirmoulle á rexedora desta localidade ourensá, Sandra Quintas, que proximamente se convocará unha xuntanza con veciños da zona para informalos das vantaxes que suporía a aplicación desta figura de mobilización pensada para a posta en valor das contornas dos núcleos de poboación.
Na xuntanza que mantiveron esta semana, a directora xeral incidiu en que as aldeas modelo, xunto cos polígonos agroforestais ou as agrupacións de xestión conxunta, son instrumentos concibidos para crear nova actividade económica no rural, contribuíndo á xeración de riqueza e á fixación de poboación, ao tempo que se avanza na anticipación aos incendios forestais, ao exercer esta actividade de devasa natural fronte ao lume. Nesa liña buscarase conseguir o apoio dos veciños de Nogueiroá á fórmula das aldeas modelo, das que xa hai 14 declaradas no conxunto de Galicia.
A maiores, no encontro entre a directora xeral e a alcaldesa de Bande falouse da posibilidade de rehabilitar o mercado do Xurés, arranxando o exterior deste importante punto de venda para os agricultores, gandeiros e industrias agroalimentarias da zona.