A directora xeral de Desenvolvemento Rural, Paz Rodríguez, e o alcalde de Curtis, Javier Caínzos, asinaron esta mañá a cesión. Estes predios -que se integran na relación de parcelas da Masa Común da parcelaria-, pasan agora a formar parte das adxudicacións do Concello despois de que este solicitara a súa cesión para fins de interese xeral.
A directora xeral de Desenvolvemento Rural, Paz Rodríguez, e o alcalde de Curtis, Javier Caínzos, asinaron esta mañá a cesión, por parte da Xunta a este Concello coruñés, da titularidade de dous predios situados na zona de concentración parcelaria de Fisteus.
Estes predios -que no citado proceso de concentración parcelaria integrábanse na relación de parcelas da Masa Común-, pasan agora a formar parte das adxudicacións do Concello despois de que este solicitara a súa cesión para fins de interese xeral. A medida lévase a cabo ao abeiro do disposto pola Lei 4/2015, do 17 de xuño, de mellora da estrutura territorial agraria de Galicia (Metaga).
Este proceso de reordenación da propiedade desenvolveuse ata a fase de acordo de reestruturación parcelaria, no marco da Lei 10/1985, do 14 de agosto, de concentración parcelaria para Galicia. Cando un proceso de reorganización do territorio aínda non está rematado, os concellos poden solicitar a cesión da titularidade de fincas do Fondo de Terras -tamén chamado Masa Común- para equipamentos colectivos ou fins de interese xeral.
O proceso de concentración parcelaria da zona de Fisteus está en fase de Acordo, afecta unha superficie de 3.504 hectáreas, repartidas en 2.011 leiras propiedade de 1.076 titulares. A toma de posesión dos novos predios repercute positivamente nos propietarios, polo incremento da base territorial que supoñen estes procesos de reordenación parcelaria.
