A directora xeral da Axencia Galega de Desenvolvemento Rural asistiu á xornada demostrativa de funcionamento desta rede e fixo entrega da mesma ao Concello de Monterrei.
A directora xeral da Axencia Galega de Desenvolvemento Rural, Paz Rodríguez, asistiu hoxe a unha xornada demostrativa da rede de calor de biomasa de Infesta e fixo a entrega da mesma ao Consello de Monterrei. Alí, a directora destacou o papel desta rede como modelo de sustentabilidade e autosuficiencia.
Esta iniciativa enmárcase dentro do proxecto Aldealix, integrado no Programa Interreg VI España Portugal (POCTEP) 2021-2027, que propón o impulso de comunidades enerxéticas locais baseadas na biomasa producida no territorio rural, unha alternativa viable para producir enerxía calorífica a partir do aproveitamento das podas xeradas nos montes das contornas das aldeas. Neste contexto, a rede de Infesta é un dos catro proxectos piloto postos en marcha en Galicia e o Norte de Portugal a través de Aldealix.
Deste xeito, a rede dá servizo a 33 vivendas da aldea, ao tempo que reduce o risco de incendios forestais mediante a limpeza dos terreos próximos ao núcleo. A caldeira funciona autoabastecéndose da leña, almacenada nun silo contiguo, para quentar a auga e distribuíla, a través dunha rede de tubaxe, aos radiadores dos fogares participantes.
O obxectivo deste proxecto non consiste só en fomentar a sustentabilidade e a eficiencia enerxética, abaratando custes, senón que tamén busca crear comunidades rurais máis autosuficientes. Así, unha vez entregada a Rede de calor ao concello de Monterrei, está previsto que esta pase a ser xestionada pola cooperativa BioInfesta, integrada polos veciños da aldea, que aportan fondos, xestionan a biomasa e comparten os gastos de mantemento do sistema.
