Estes fondos serven para o arranxo e mellora de camiños de titularidade municipal. A conselleira María José Gómez visitou hoxe as obras no lugar de Vilar de Santiago, en Riotorto. Salientou a importancia das infraestruturas viarias para as contornas rurais, xa que xeran cohesión social e territorial, mellorando as condicións de vida e traballo nestas zonas.
A Consellería do Medio Rural destina máis de 400.000 euros no período 2024-2026 para a mellora de infraestruturas rurais nos concellos lugueses de Riotorto e Mondoñedo, máis concretamente no arranxo e mellora de camiños de titularidade municipal.
A titular do departamento, María José Gómez, acompañada pola directora xeral da Axencia Galega de Desenvolvemento Rural, Paz Rodríguez; e polos alcaldes de ambos concellos, Manuel Otero, de Mondoñedo; e Clemente Iglesias, de Riotorto; visitou hoxe as obras de mellora de infraestruturas rurais no lugar de Vilar de Santiago, neste último municipio.
Neste acto, a conselleira salientou a importancia das infraestruturas viarias para as contornas rurais, xa que xeran cohesión social e territorial, mellorando as condicións de vida e traballo nestas zonas. Engadiu que os camiños rurais facilitan a accesibilidade e vertebración do territorio, reforzan o tecido social e contribúen a mellorar a capacidade organizativa e contribúen a fixar poboación. Favorecen ademais a mellora da competitividade das explotacións, buscando tanto unha adecuada conexión entre os núcleos de poboación como a mellora nos accesos ás parcelas agrícolas.
Cómpre sinalar que a Consellería do Medio Rural, a través da Axencia Galega de Desenvolvemento Rural, convoca anualmente este tipo de achegas de xeito ininterrompido dende o ano 2013. Só dende o ano 2016 destináronse máis de 167 millóns de euros a este concepto, o que permitiu actuar en 6.042 camiños municipais, totalizando unha lonxitude de 4.744 quilómetros de vías rurais melloradas no conxunto de Galicia.
