A conselleira María José Gómez presidiu esta mañá o acto de entrega e subliñou que con estes procesos contribúese ao desenvolvemento dos territorios, á redución do minifundismo e á mellora do rendemento sostible da actividade agroforestal. Lembrou que desde o ano 2020 o Goberno galego rematou un total de 37 parcelarias e que, ao tempo, desde o 2021 se decretaron outros 30 novos procesos.
A conselleira do Medio Rural, María José Gómez, acompañada pola directora xeral da Axencia Galega de Desenvolvemento Rural, Paz Rodríguez; e polo alcalde de Santiso, Manuel Adán; presidiu esta mañá o acto de entrega de títulos de propiedade da concentración parcelaria de Novela-Liñares-Pezobrés, situada neste municipio coruñés, que beneficia 370 propietarios e supón mobilizar preto de 850 hectáreas.
En concreto, este proceso abrangue unha superficie de 846 hectáreas divididas inicialmente en 3.087 parcelas cunha superficie media de 2.479 metros cadrados e, para o seu desenvolvemento, a Consellería do Medio Rural investiu máis de 2,3 millóns de euros. Tralos traballos realizados, a superficie media das fincas incrementouse ata os 8.412 metros cadrados e reduciuse o número de predios ata 910. Polo tanto, o número de parcelas diminuíu nun 70% e a dimensión das mesmas multiplicouse por tres.
A conselleira destacou a importancia que teñen estes procesos de mobilización, xa que contribúen ao desenvolvemento dos territorios, á redución do minifundismo e á mellora do rendemento sostible da actividade agroforestal. Neste sentido, reafirmou o compromiso do Goberno galego para axilizar estes procesos e, este mesmo ano, xa se entregaron os títulos de parcelarias en Xunqueira de Ambía, Oroso e hoxe tamén se fará entrega dunha nova en Lalín, a maiores desta de Santiso.
Gómez salientou que se seguirá apostando por estas ferramentas e detallou que desde o ano 2020 xa se remataron 37 parcelarias, incluíndo as dúas entregadas hoxe, con preto de 25.000 hectáreas mobilizadas de máis de 19.300 propietarios. A maiores, puxo en valor as 30 concentracións parcelarias decretadas desde o 2021 en Galicia, a última en novembro deste mesmo ano en Baleira, que abranguen algo máis de 25.500 hectáreas de case 16.500 titulares.
No vindeiro ano, a Consellería do Medio Rural manterá o seu compromiso con estes procesos de mobilización de terra cun investimento de 16,7 millóns de euros, case catro máis que os deste ano, co obxectivo de seguir avanzando con estes instrumentos que facilitan o incremento o aumento da base territorial das explotacións.
