A directora xeral da Axencia Galega de Desenvolvemento Rural, Paz Rodríguez, asistiu esta mañá á 8ª reunión do grupo Leader en Barcelona.
Alí, a directora xeral puxo de relevo a importancia que ten esta medida para Galicia, con repercusións moi positivas na creación de emprego e fixación de poboación nas contornas rurais da comunidade, favorecendo a súa dinamización económica e social. Destacou tamén que mentres a medida Leader estivo incluído no Programa de Desenvolvemento Rural (PDR) de Galicia, puideron aprobarse máis de 1.500 proxectos, consolidar máis de 4.000 empregos e crear uns 1.100 novos. Mobilizáronse tamén 169 millóns de euros cunha axuda pública de 77,5 millóns de euros para operacións a terceiros.
O obxectivo desta xornada é favorecer o contacto entre as diferentes comunidades autónomas co fin de debater retos territoriais e compartidos dende a cooperación transfronteiriza. O encontro combina relatorios, espazos de debate, visitas a proxectos locais e actividades para impulsar redes de traballo colaborativo entre os asistentes, así como crear un espazo de diálogo no que compartir experiencias.
