Inés Santé explicou esta e outras novidades do novo Programa Leader 2023-2027, salientando que para este novo período os grupos de desenvolvemento rural contaron cunha axuda de 35.000 euros cada un para a elaboración da súa estratexia.
A directora xeral da Axencia Galega de Desenvolvemento Rural, Inés Santé, puxo en valor esta mañá na Comisión 7ª do Parlamento o Bono Activa Rural do programa Leader, unha nova forma de fomentar o emprego no rural. Así, explicou que se trata dunha novidade destinado á creación e posta en marcha de actividades non agrícolas en zonas rurais.
Desta forma, os grupos de desenvolvemento rural poderán recoller nas súas respectivas estratexias a posibilidade de conceder este bono, que consiste nunha axuda de ata 18.000 euros en dúas anualidades, coa obriga de manter a actividade durante polos menos cinco anos e o cumprimento do plan empresarial presentado.
Ademais desta novidade, a directora xeral explicou que o novo programa Leader 2023-2027 contempla outras iniciativas, tales como novas posibilidades de axudas en proxectos do ámbito agrario, en iniciativas de transformación e comercialización de produtos agrarios e todos aqueles investimentos que estean vinculados aos instrumentos de mobilización ou recuperación de terras. En concreto, poderán beneficiarse actuacións de mellora da biodiversidade e a conectividade ecolóxica e pequenos proxectos de actividades agrarias que non sexan susceptibles doutras axudas.
Neste senso, Santé sinalou que esta novidade permitirá financiar proxectos orientados ao aproveitamento agrícola, gandeiro ou forestal da terra, como son os polígonos agroforestais, as agrupacións e actuacións de xestión conxunta e os proxectos de ordenación produtiva das aldeas modelo. Así mesmo, tamén se inclúen aquelas iniciativas destinadas a mellorar a calidade de vida da poboación rural, como son os plans de dinamización do núcleo rural das aldeas modelo.
Durante a súa intervención, a directora xeral lembrou que Galicia foi das primeiras comunidades autónomas en poñer en marcha o proceso de selección dos novos grupos de desenvolvemento rural para este novo período do Leader, dándolles máis tempo a estas entidades para a elaboración das súas estratexias, co obxectivo de que gañaran en calidade e co maior grao posible de participación da poboación.
Así mesmo, Santé sinalou que os 24 grupos de desenvolvemento rural dispuxeron do triplo de orzamento que tiveron no período anterior para elaborar as súas estratexias, dotándoos a cada un dunha subvención de 35.000 euros para tal fin, é dicir, un orzamento conxunto de 840.000 euros fronte aos 320.000 euros do ano 2016. “Buscamos estratexias de desenvolvemento local ambiciosas e de gran calidade que puideran ofrecer unha resposta axeitada ás necesidades dos respectivos territorios rurais de Galicia”, salientou.
Para iso, conseguiuse unha coordinación entre as 24 estratexias e as universidades de Santiago de Compostela e de Vigo, mediante un convenio subscrito coa Asociación de grupos de desenvolvemento rural de Galicia. Desta forma, a USC prestou a súa experiencia en estudos relacionados coa ordenación e planificación sostible de terras, mentres que a UVigo aportou ideas relacionadas coa economía e gobernanza pública, economía circular e negocios familiares.
