A Axencia Galega de Desenvolvemento Rural participou hoxe no seminario Rural communities tackling climate change -comunidades rurais fronte ao cambio climático-, enmarcado dentro do “Pacto Rural Europeo”, para presentar os resultados do Proxecto Interreg Europe Down to Earth do que forma parte xunto a outros seis países europeos. O subdirector de Promoción Internacional e Rural Intelixente da Axencia, Jorge Blanco, foi o encargado de expoñer por vía telemática os resultados desta iniciativa, seleccionada como boa práctica na loita fronte ao cambio climático.
No seminario, no que tamén se deron a coñecer outros proxectos que se están a desenvolver en España e noutros países como Irlanda, Alemaña, Finlandia ou Austria, analizáronse as estratexias deseñadas para mitigar os efectos da crise climática vinculada ao ámbito rural.
O proxecto Down to Earth, liderado pola Axencia Galega de Desenvolvemento Rural, traballa para analizar o impacto das políticas públicas sobre o despoboamento rural, identificando liñas de mellora nestas ferramentas que permitan para manter persoas e actividades económicas no medio rural, como principal estratexia para reducir o impacto dos desastres naturais ligados á crise climática, como por exemplo, os incendios forestais.
Seguindo esta liña, dentro do proxecto estase analizando o novo instrumento normativo co que conta Galicia, a Lei de recuperación da terra agraria, e a súa contribución na mitigación os efectos do cambio climático. Tamén se estuda a súa potencial contribución á revitalización de pequenos núcleos rurais, a través das aldeas modelo, así como á recuperación de terras en abandono para dedicalas á agricultura e á gandaría, a través de instrumentos como os polígonos agroforestais.
A recuperación da agricultura e gandería en extensivo permite facer un manexo axeitado do territorio, ademais de impulsar o emprendemento e a diversificación produtiva nestas áreas rurais, maximizando os servizos que nos presta a natureza e o territorio, e conectando estas producións con outros sectores, como por exemplo, o turismo.
Visión a longo prazo para as zonas rurais da UE
A Comisión Europea lanzou no ano 2021 o Pacto Rural, como parte da súa Visión a longo prazo para as zonas rurais da Unión Europea, e que serve para promocionar o marco de cooperación entre os poderes públicos, a sociedade civil, as empresas, o mundo académico e os cidadáns, tanto a nivel europeo, como nacional, rexional e local.
O Pacto Rural pretende impulsar os obxectivos compartidos desa visión a longo prazo, fomentando a colaboración entre todos os niveis de goberno e mobilizando ás autoridade públicas e ás partes interesadas para que actuar adaptando as políticas ás particularidades de cada territorio.
O seminario celebrado hoxe estivo organizado pola Oficina de Apoio ao Pacto Rural, que é a responsable de coordinar e implantar as actividades de traballo en rede, promovendo as boas prácticas que poidan inspiran accións no rural.